Panagbenga Festival 2008

NAGTUDO iti Sabado; ‘tay met kunada a naanus a tudo ti insublatna iti kabigatanna, Domingo, Peb. 24. Ngem saanna ketdi a sinebseban ti gagar dagiti agbuya, nangruna dagiti simmangat pay iti Baguio a taga-sabsabali a lugar, tapno maimatanganda laeng ti kadaegan a festival iti Amianan— ti ipagpampannakkel ti Siudad ti Baguio a Panagbenga Festival— wenno Flower Festival.

Itoy ngamin a parambak a maiparada dagiti naidumduma a karosa a naaramid manipud kadagiti nadumaduma a sabsabong. Malaksid kadagiti adu pay nga aktibidad, adda pay dita ti sangkauray dagiti agbuybuya a showdown competition iti street dancing iti Athletic Bowl iti Burnham Park. Ania ngamin, aya, ti Panagbenga? Maysa a balikas a Kankanaey daytoy a kayatna a sawen, panagsasabong, wenno panagukrad dagiti sabsabong. Nairanta ti parambak a pangitandudo iti maysa kadagiti kangrunaan a pamastrekan ti Benguet no di man ti Cordillera— ti industria ti sabsabong. Ngem nupay nagtuloy ti regget dagiti agbuya, ti met laeng tudo iti ti nakaguped iti pannakaisagana dagiti dadduma a karosa. Iti nayeskediul a 32 a karosa, 17 laengen, wenno nasursurok ngem kagudua ti naiparada. Addaan iti P50,000 a badyet ti tunggal karosa, pinadas ti tunggal maysa kadagitoy a tiniliw ti panagdayaw dagiti agbuybuya. Mabalin a saan a kas iti napalabas a tawen ti kagarbo ita ti Panagbenga Festival gapu iti tudo, mabalin pay a makangngegtayo iti reklamo a kasla saan unayen a matiliw dagiti maipabpabuya nga aktibidad ti nariingan a kultura ni i-Cordillera, ngem, ala, uray kaskasano, sigurado a ti sumaruno a Panagbenga, isunto manen ti gagaraen dagiti taga-patad nga umay buyaen— ket kas iti kallabes a Panagbenga, pagbalinennanto manen ti siudad a kasla Divisoria ti kaadu ti taona!—O

 

 


Press Release

Powered by mod LCA

WE ARE ONLINE!

CLOSE